Жыл сайын 1-7 тамыз аралығында бүкіл әлемде 1990 жылдан бері Дүниежүзілік ана сүтімен қоректендіру апталығы атап өтіледі. Дүниежүзілік денсаулық сақтау ұйымы (ДДҰ) нәрестелер өмірінің алғашқы кезеңінде, яғни ағзаның көптеген жүйелері, әсіресе иммундық жүйе қалыптасатын кезде, олардың барынша ұзақ уақыт бойы ана сүтін алуына жағдай жасауға ұмтылады.​

Ана сүтімен қоректендіруді қолдаудың әртүрлі жолдары бар - қоғамдық орындарда, мысалы, дәмханада емізіп отырған аналарға жылы қатынас танытудан бастап, медициналық қызметкерлердің пайдалы кеңестері мен ана мен баланы қорғауға бағытталған мемлекеттік шараларға дейін.

Дүниежүзілік ана сүтімен қоректендіру апталығы - баланың ана сүтімен қоректену құқығын қорғауға және аналарға емізудің артықшылықтары туралы түсіндіруге бағытталған.

Бұл шаралар аналар мен нәрестелердің денсаулығын қорғауға айтарлықтай үлес қосады.

Әрбір ана өз баласын қанша уақыт емізу қажет екенін өзі шешуі үшін, оған жеткілікті ақпарат пен қолдау көрсетілуі тиіс. Ол үшін кәсіби емізу кеңесшілері қызметін дамыту, Ана сүтін алмастырғыш өнімдерді сатуға арналған Халықаралық ережелердің сақталуын бақылау, сондай-ақ әйелдің өз үйінде, медициналық мекемелерде және жұмыс орнында өзін сенімді, қорғалған әрі еркін сезінуіне жағдай жасау қажет.

Ана сүтімен қоректендіру - тек баланың ғана емес, бүкіл қоғамның болашағы үшін маңызды негіз.

Бұл денсаулық сақтау саласындағы шығындарды азайтып, баланың ақыл-ой дамуын арттырады, экономикалық тұрақтылыққа ықпал етеді және нәрестеге өмірдің салауатты басталуын қамтамасыз етеді.

Ана сүтімен қоректендірудің ана үшін пайдасы:

Ана денсаулығын нығайтады, сүт безі, аналық без қатерлі ісігі мен анемия қаупін азайтады.

Балаға деген эмоционалдық жақындықты күшейтеді.

Қаржылық жағынан тиімді - жасанды тамақтандыруға қарағанда арзан.

Ана сүтімен қоректендірудің бала үшін пайдасы:

Толыққанды, теңгерімді тамақ (иммуноглобулиндерге бай, құрамында көптеген лейкоциттер, өсу факторлары мен А дәрумені бар).

Жеңіл қорытылады және толық пайдаланылады.

Инфекциялардан қорғайды.

Ішек микрофлорасының дұрыс қалыптасуына ықпал етеді.

ДДҰ баланың өмірінің алғашқы 6 айында тек ана сүтімен қоректендіруді ұсынады. Емізу баланың туғанынан кейін алғашқы бір сағат ішінде басталып, баланың қалауы бойынша жалғасуы тиіс. Шөлмек пен емізікті қолданудан аулақ болу қажет.

Ана сүтімен қоректендіру - бұл табиғи физиологиялық үдерістің жалғасы.